വര

ഞാനൊരു വര വരച്ചു. അതൊരു നേര്‍രേഖയാണെന്ന് ഞാനുറച്ചു വിശ്വസിച്ചു. എന്നാല്‍ അതങ്ങനെയല്ല എന്നും, പലയിടത്തും അതിനു വളവുകളുണ്ടെന്നും പലരും പറഞ്ഞു. അതു കേട്ടു കേട്ട് എനിയ്ക്കു സംശയമായി. ഞാന്‍, ആ വരയുടെ, നേരെയല്ല എന്നു തോന്നിയ ഭാഗങ്ങള്‍ മായ്ക്കുകയും, പകരം ചെറിയ നേര്‍രേഖകള്‍ വരച്ച് ആദ്യത്തെ വരയെ നേരെയാക്കാന്‍ ശ്രമിയ്ക്കുകയും ചെയ്തു. ഒടുവില്‍ ശേഷിച്ചത് ഒരു നേര്‍രേഖയ്ക്കു പകരം പല രേഖകളായിരുന്നു. മാത്രമല്ല, ശേഷിച്ച ഓരോ രേഖയും പഴയ രേഖയുടെ ചെറിയ രൂപങ്ങളായിരുന്നു!