ശരീരം

ആഗ്രഹങ്ങളിൽമുങ്ങി ശ്വാസംമുട്ടി വിഷമിക്കുന്ന ശരീരമഴിച്ചുവെച്ച് ഞാനുറങ്ങാൻ കിടന്നു. ഇടയ്ക്കെപ്പോഴോ ഉണർന്നപ്പോൾ അപ്പോഴും പിടയുന്ന ശരീരം കണ്ട് ചിരി മാത്രമല്ല അവജ്ഞയും തോന്നി. ശരീരമിനിയും എടുത്തണിയാതിരിക്കാൻ വഴിയെന്തുണ്ടെന്നാലോചിച്ചാലോചിച്ച് ഞാനുറങ്ങിപ്പോയി.

അവസാനത്തേതിന്റെ മാധുര്യം

അവസാനത്തേത് മാധുര്യമേറിയതായിരിക്കും, പ്രത്യേകിച്ച് അവസാനത്തേതാണെന്ന് അറിയുകയാണെങ്കിൽ. ഉദാഹരണത്തിന് എനിക്കാരെങ്കിലും ഒരു ലഡു തരുകയാണെന്ന് വിചാരിക്കുക. അത് കഴിച്ചു കഴിയുമ്പോൾ മറ്റൊന്നുകൂടെ തരുകയാണെന്നും അപ്പോൾ കാലിയായ ലഡുവിന്റെ പാക്കറ്റ് ഞാൻ കാണുകയാണെന്നും വിചാരിക്കുക. അപ്പോൾ ആ ലഡു ആദ്യത്തേതിനേക്കാൾ എനിക്കെത്ര മാധുര്യമേറിയതായിരിക്കും! ഇനി മറ്റൊരുദാഹരണമെടുക്കാം. ഈ പോസ്റ്റ് എന്റെ അവസാനത്തേതാണെന്നും അത് ഞാൻ മനസ്സിലാക്കുന്നുവെന്നും വിചാരിക്കുക. എത്ര വികലമായ് എഴുതിയിരുന്നാലും ഈ പോസ്റ്റ് എനിക്കെത്ര പ്രിയപ്പെട്ടതായിരിക്കും എന്നോർത്തുനോക്കൂ. അവസാനത്തെ ഉദാഹരണമെടുക്കാം. അത് ഏറ്റവും  അർത്ഥപൂർണമാക്കാൻ ഞാനെത്ര ശ്രമിക്കുമെന്ന് ആലോചിച്ചുനോക്കിയാൽതന്നെ കാര്യങ്ങൾ എളുപ്പത്തിൽ മനസ്സിലാകുമെന്ന് കരുതുന്നു.