പ്രശ്‍നം

ദാഹിക്കുന്നുണ്ട്. അടുക്കള വരെ പോയി വെള്ളം കുടിച്ചാൽ തീരുന്ന പ്രശ്നമേയുള്ളൂ. പക്ഷെ, ദാഹം ഒരു പ്രശ്നമാണോ? സ്വയം ഉത്തരം പറയാനാണെങ്കിൽ ചോദ്യം ചോദിക്കുക വലിയ മിനക്കേടുള്ള കാര്യമാണ്. ഉത്തരം കിട്ടാത്ത ചോദ്യങ്ങൾ ഒരു ഭാരമായി അവശേഷിക്കും. അത് ഹൃദയത്തെ പിടിച്ച് താഴോട്ടു വലിക്കുകയും തുടകൾക്ക് പരിക്കേൽപ്പിക്കുകയും ചെയ്യും. പക്ഷെ ഉന്തിതള്ളി വരുന്ന ചോദ്യങ്ങളെ എന്ത് പറഞ്ഞു ഒഴിവാക്കാനാണ്? പൂർണ വിരാമം തന്നെയാണ് ചോദ്യചിഹ്നത്തെക്കാൾ എന്തുകൊണ്ടും സമാധാനപരം. എന്നു വച്ച് ചോദ്യചിഹ്നം നിരോധിക്കാനാവുമോ? ഇനി ചോദ്യചിഹ്നം നിരോധിച്ചെന്നു വെയ്ക്കാം. അതിനു പകരമായി പുതിയൊരു ചിഹ്നം കടന്നുവരും. അപ്പോഴെന്തു ചെയ്യും. ഇതൊക്കെയാണ് യഥാർത്ഥ പ്രശ്നങ്ങൾ - ചെറിയ തോതിലുള്ള ഒരു മൂക്കടപ്പൊഴിച്ചാൽ.