കേട്ടറിഞ്ഞ ചില കാര്യങ്ങള്‍

ഞാന്‍ കേട്ടിട്ടുണ്ട്,

അങ്ങയുടെ സവിധത്തില്‍ എന്നും

വസന്തമാണെന്ന്;

അവിടെയുള്ള പൂക്കളുടെ സുഗന്ധം

മറ്റെങ്ങുമില്ലെന്ന്.

ഞാന്‍ കേട്ടിട്ടുണ്ട്,

വഴികളെല്ലാം അവിടെ

സംഗമിക്കുന്നുവെന്ന്;

അവയുടെ തുടക്കവും

അവിടെനിന്നാണെന്ന്‌.

ഞാന്‍ കേട്ടിട്ടുണ്ട്,

അതിഥിയും ആതിഥേയനും അവിടെ 

ഒന്നാകുന്നുവെന്ന്;

സംശയത്തിന്റെ തൂവയോ,

ദുഖത്തിന്റെ മുള്ളുകളോ,

അഹങ്കാരത്തിന്റെ വള്ളികളോ

അവിടെയെങ്ങുമില്ലെന്ന്.

ഇങ്ങനെ ഒരുപാടു ഞാന്‍

കേട്ടിട്ടുണ്ട്.

കേട്ടതെല്ലാം ശരിയാണെന്ന

തോന്നലുമുണ്ട്.

എങ്കിലും,

കണ്ടറിയാതെ തീരുമാനിക്കുന്നതെങ്ങനെ.

ഇങ്ങനെയെല്ലാമുണ്ടെങ്കില്‍

കാണാതിരിക്കുന്നതുമെങ്ങനെ.