മഹത്വം

മഹത്വം സ്വയം വെളിവാക്കപ്പെടും എന്ന തത്വത്തിൽ ഉറച്ചു വിശ്വസിച്ച അവൻ മുറിയിൽ കയറി കതകടച്ചിരുന്നു. മഹത്വം വെളിവാക്കപ്പെട്ടില്ല. രണ്ടു കാരണങ്ങളുണ്ടാകാം, അവൻ ചിന്തിച്ചു. ഒന്നുകിൽ താൻ മഹാനല്ല, അല്ലെങ്കിൽ ആ തത്വം പാടെ തെറ്റാണ്. എന്നാൽ താൻ മഹാനാണ് എന്ന കാര്യത്തിൽ അവനൊരു സംശയവുമുണ്ടായിരുന്നില്ല. അപ്പോൾ മഹത്വം സ്വയം വെളിവാക്കപ്പെടുമായിരിക്കില്ല. അവൻ തന്റെ മുറിയ്ക്ക് പുറത്തിറങ്ങി തന്റെ മഹത്വം കൊട്ടിഘോഷിച്ചു. ചുറ്റുപാടുമുള്ള അടഞ്ഞ ചെവികളിൽ തട്ടി തിരിച്ചു വന്ന അതിന്റെ പ്രകമ്പനങ്ങൾ അവനെ നിരാശയുടെ പടുകുഴിയിലേയ്ക്ക് തള്ളിയിട്ടു.